قريت قبل كده ان تحقيق الاهداف بيكون نسبة تحقيقه اكبر لو اتكتب
والمفروض ان مع كل بداية عام جديد الواحد يكتب اهدافه و كل الحاجات اللى بيتمنى انه يحققها خلال السنة دى
و طبعا انا مكدبتش الخبر وكتبت لستة طويلة وعريضة وكل الحاجات اللى ناوى احققهاالسنة دى ومن الرغم ان مافيش اى حاجة من الحاجات اللى كاتبتها اتحققت السنة اللى فاتت
قررت السنة دى تكون احلامى اكتر واقعية
و هانحن فى بداية السنة الجديدة قلت اكتب بقى كل اللى بتمناه لعل و عسى انه يتحقق وطبعا حاحول على قد مقدر وحعمل المستحيل انى احققه
طبعا بتمنى السنة دى تكون سعيدة من الرغم ان كان من اول يوم فيها بيبشر بسنة سودة علينا الا انى متفائل جدا ومتأكد ان السنة دى سنة الحظ بتاعتى وطبعا ده مش بس مجرد احساس
لا ده كمان علشان برجى الفلكى قالى كدة وكمان علشان طلعلى الكوين (العملة بالعربى) فى كيكة الكريسمامس ( كيكة بنجبها كل سنة
بيكون فيها عملة و بتتقطع على حسب عدد الافراد اللى فى البيت او ممكن كمان على حسب عدد المعارف واللى بتطلعلوا الكوين وهو بياكلها بتبقى دى سنة الحظ بتاعته) ومش بس علشان الكيكة
علشان فى كتاب السر (the secret)
بيقولك ان كل حاجة بتفكر فيها بتتحقق يعنى افكارك زى المغناطيس بيجذب كل الحاجات اللى بتفكر فيها ايجابية او سلبية طبعا على حسب دماغك بقى فقررت ان السنة دى تكون
سنة حلوة و جميلة و لذيذة و سعيدة
بتمنى اسافر باريس و ايطاليا و سيوة و السويس و لندن و دريم بارك
بتمنى ارجع لليونان واتمشى فى الشوارع واسلم على كل الجيران و القرايب واتصور فى الميادين اللى هناك واروح الجبال و الجزر اللى هناك حاجة كدة من جوايا اسمها الحنين للماضى
بتمنى اصور نيكول كيدمان و انجلينا جولى و داليدا الله يرحمها و سعاد حسنى الله يرحمها و حسنى مبارك (ربنا يطولنا فى عمره) احم احم يوووه ما قلنا لازم السنة دى تكون احلامنا واقعية
علشان نضمن تحقيقها بقى انت نسيت يا بلبل ولا ايه ؟؟؟؟
بتمنى اعمل معرض تصوير فوتوغرافى بطريقة جديدة ومختلفة و بتمنى انظم ورش عمل فى التصوير والفن عموما
بتمنى انى اكون مصور مشهور وصحفى و رجل اعمال ومخرج و كاتب و رسام
بتمنى انى اخلص قراية الكتب اللى عندى و اشترى كتب تانية بس متكنش مملة
بتمنى انى العب يوغا
بتمنى ارقص فى الشارع
بتمنى انى انزل البحر ملط
بتمنى انى مخافش و ميهمنيش حد حتى لو حيزعل بس ماجيش على نفسى اكتر من كدة
بتمنى انى اشرب بيرة
بتمنى الدنيا تنزل تلج و مطر كتيييييييييييييييييييييييييييييييييير
بتمنى انى اشوف شروق الشمس كل يوم
بتمنى انى اشيش شيشة حلوة و متفحمش
بتمنى انى اصلى و اقرب من ربنا اكتر
بتمنى ان الناس تبقى فى حالها شوية يخربيت كده
بتمنى ان ربنا يخليلى اهلى و صحابى
بتمنى انى اطير بقى زهقت من ان لحد دلوقتى مش عارف اطير
بتمنى اموت
يا رب يا رب يا رب حقق ليا كل الحاجات دى انا عارف ان دول كتير اوى و صعب اوى بس انا عارف ان مافيش حاجة صعبة عليك
ملحوظة : ممكن فى اى وقت اغير رأيى واشيل او اعدل او اضيف امنية جديدة
so impressing
ردحذفya rab tet7a2a2
i will do the same ya pola and write
قريت كل مدونتك .. مستغربة أزاى أنتا شبهي كدا .. بس أنا بكتب أحسن :P
ردحذفبرافو .. أملي نفسك أكتر حب و سلام :)
و استمتع بالجمال انتا تستحق كدا :)