تحب عروستك ازاى يا فندم ...... 3 دقايق وتكون جاهزة حضرتك

محترمة – بتصلى – بتعرف ربنا – بنت ناس – محجبة – عمرها ماصحبت قبل كدة ولا ليها فى الحوارات دى واكون انا اول راجل فى حياتها ... من الاخر انا عايز واحدة زى امى ...

المواصفات دى حتلاقيها فتاة احلام كل شاب مع الاضافات المختلفة بس مارضيتش اكتب الاضافات دى علشان بتختلف مابين كل واحد والتانى زى بيضة و سامرة وطويلة ورفعية وقصيرة وجسمها مش عارف ايه ومقلبظة والحوارات دى بس معظم المواصفات الرئيسة اللى لازم تكون فى فتاة احلام كل واحد هما دول .... وغريبة جدا ان اللى بيقول المواصفات دى بيبقى لافف وداير مع بنات الله منهم المحترمين جدا ومنهم اللى مش محترمين جدا برضه والغالبية العظمى بيكونوا مش محترمين جدا خالص نهائى بتاتا ..

الفكرة بقى ان الموصفات دى لازم ولابد وحتما تلاقى فيهم صفة المحجبة ومعرفش ليه؟ ان الحجاب بقى علامة مميزة على الاحترام مع ان ممكن اوى معظم البنات اللى لف ودار معاهم كانوا محجبات برضه وممكن اوى بنات محترمة جدا وتعرف ربنا وكويسة ومتربية ومتكنش محجبة
وبرضه كلامى ده مش معنى ان كل المحجبات لابسينه وهما مش مقتنعين ومش محترمين بالعكس جدا فى بنات كتيرة جدا محجبين و فى قمة الاخلاق بس اللى اقصده هنا ان الحجاب مش علامة مميزة ان البنت تكون محترمة
علشان كتير جدا بيلبسوا الحجاب وهما مش مقتنعين بى ولظروف مجتمعية بحتة اكتر من انها ظروف دينية وربنا هو العالم بنية كل واحد وواحدة يعنى
بس الاحصاءات الاخيرة بتقول ان فى مصر حوالى 95% محجبات ومتقنعنيش ان النسبة الرهيبة دى كلهم محجبات عن اقتناع علشان اعرف نماذج بالهبل وبالعبيط كمان لبسينه وشغالين الله ينور يعنى

نقطة بقى عمرها ماصحبت او حبت او الكلام ده حتلاقى ان النقطة دى هى اللى فارقة معاه اوى ومش اوى و بس لأ اوى اوى اوى اوى اوى اوى اوى
ليه ؟؟؟؟؟
علشان حضرتك ياما ضحكت على بنات الناس واستغليت ان البنت فى مصر عندها كبت فى البيت وفى كل حتة ونفسها تحب و تتحب فضحكت انت على البنى ادمة دى واستغليت النقطة دى وعشت فيها دور فارس الاحلام اللى جايلها بالحصان الابيض وحتاخدها وتهربوا لبعيد وعشت دور أخونا روميو و جاك بتاع فيلم تايتنك واقنعتها ان هى دى البت اللى بتدور عليها وماصدقت انك لاقيتها وبعد اسبوع ولا اسبوعين ولا حتى شهر وبالكتير سنة واتنين وزهقت فبتدور على بنت تانية ساذجة وترسم عليها نفس الدور وضحكت على بنات ناس كتير جدا
والضحك على البنات دى مابيبقاش بس بكلمة حلوة وبحبك وبتاع لا الموضوع بيكبر عن كدة وعلشان انت مش بتفكر غير بنصك التحتانى بيبقى الضحك عليها بلمسة ثم بوسة ثم ربنا حليم ستار
من رغم ان بنات كتيرة جدا علشان قريبين من ربنا وربنا بيحبهم فبيقدروا يحافظوا على نفسهم كويس وربنا بيسترها معاهم بس برضه بنات كتيرة جدا الساذاجة بتبقى الصفة اللى مسيطرة عليهم فسهل ان الواحد يضحك عليهم
والغريبة ان ممكن اوى يبقى عندك اخت واى بنت عم او بنت اخ او بنتك انت يحصل معاها نفس الموقف ده بس تقول لمين ...

نيجى بقى فى حتة واحدة زى امك .... لامؤخذة ومع كامل احترامى للست امك ولاهى بس مين قالك ان امك ان الراجل اللى بتحبه واللى هو ابوك ده هو اول راجل فى حياتها ؟؟؟؟
مش معنى ان الواحدة حبت حد قبل كدة تبقى بنى ادمة مش كويسة هى معملتش حاجة غلط على فكرة علشان الحب عمره ماكان حاجة عيب وغلط وحرام ...
ومنضحكش على بعض مش معنى ان بقول كدة يبقى انا كدة ولامؤاخذه برضه رافع الاريل ..لا يا حبيبى انا كده معناها واحد عقلى متفتح وفاهم الصح والغلط وفى مقولة قريتها قبل كدة لدكتور مصطفى محمود بتاع العلم والايمان بتقول من كان منكم يريد خديجة فليكن هو محمد

ياريت نبطل نفكر بطريقة قديمة وغلط وتقليدية ونفتح مخنا ونفكر صح ونبتدى نحكم على الناس بالطريقة السليمة والصح ونبطل يضحك علينا بحبة المظاهر اللى بتودينا لورا دى
واحلى موقف حصل ان واحد اتجوز واحدة محترمة وكل حاجة وبعد الجواز اكتشف ان هى كانت بتخونه مع كل صاحب ليه وجرانه ....دى حتى البواب يا اخى خانته معاه
فماتعملش نفسك مفتح وتاخد على قفاك بعد كدة
خليك واقعى واحكم على الناس بالتعامل معاهم ومعاك
وغير لستة المواصفات دى واختار البنت الكويسة اللى تستريحلها وتأمن ان دى حتحافظ عليك وعلى بيتك وولادك وعلى سمعتك