ربنا كرمها و أحنا بهدلناها

كنت مشترك في ورشة عمل فني.. وكانت فكرة المعرض اللي هيتعرض فيه اللوحات الفنية هو التضاد أو بمعنى تاني الاختلاف، يعنى بالبلدي كده.. كل حاجة وعكسها.
وساعتها روحت كافيه هادى أفكر بهدوء أرسم إيه، وأول حاجة جات في دماغي إني أرسم راجل وست؛ على أساس إن ده عكس ده، ساعتها جات صاحبة الكافيه وإسمها داليا النيل وهي فنانة تشكيلية، لما شافت رسَمْت إيه عجبتها جداً ولما قلتلها الفكرة قالتلي إن الرسمة حلوة بس ما تنفعش علشان عمر ما الراجل كان عكسه الست.. واستغرَبْت
ساعتها هي بتقول إيه !!

بس ردت عليا لما لاحظِت الاستغراب ده على وشى من غير ما أنطق ولا كلمة؛ قالتلي إن الراجل والست بيكملوا بعض.. علشان كده هما مش عكس بعض، بالعكس هما واحد وكل واحد منهم بيكمل التاني.. تقدر تقول بقى كدة من ساعتها تغير عندي مفهوم المرأة .
الغريبة إن الموضوع ده مر عليه أكتر من أربع سنين والنهاردة وأنا قاعد على القهوة مع صحابي بنتكلم عموما لقيت عدد كبير جداً بيقول إن الرجل أفضل من المرأة، إتنرفزت أوي بصراحة بس ما فتحتش بقي بكلمة.. عايز أعرف ليه ؟؟

لقيت كله بيستدل بالقرآن و بمواقف الرجال عموما في الحياة، وأول حاجة قالوها إن" الرجال قوامون على النساء".. الأول نفهم معنى الآية، المراد به القوامة أي أن الرجل أقدر على القيام بشئون الأسرة وتولي أمرها من المرأة .
طيب دلوقتي فيه ستات كتير جداً بتشتغل وهي اللي بتصرف على البيت وكمان بتصرف على جوزها، ومش بس بتصرف لا دي كمان مسئولة عن تربية العيال والأكل والشرب وهو لا مؤاخذة ما بيعملش حاجة... هل كدة إن الراجل ده أفضل منها ؟؟؟

ليه نظرتنا للمرأة إنها الكائن الضعيف اللي ربنا خلقه تكون ليس أكثر من مجرد تابعة للرجل، ولو هو كده فعلاً ليه ربنا ما خلقناش كلنا رجالة، ربنا لما خلق سيدنا آدم خلق برضه حواء علشان يكملوا بعض ويتعايشوا مع بعض ويخلفوا ويعمروا الأرض، غير كده الرسول ذاته نفسه قال فيما معناه "خذوا نصـــــــــــــــــــف دينكم عن هذه الحميراء" يقصد عائشة رضي الله عنها، وكلنا عارفين إن أحكام الفقه والأحاديث كتير منها منقولة من عائشة رضي الله عنها، فا ليه لحد دلوقتي بنتعامل مع المرأه إنها أقل ...؟؟؟

وكمان الدكتور طارق سويدان عد كلمة ذكر و أنثى و رجل و امرأة في القرآن الكريم ووجد إن هما متساوين بالضبط، وبالنسبة لحتة الميراث.. إن الرجل مثل حظ الأنثيين فده علشان المفروض إن الرجل هو المكلف شرعاً بالإنفاق والست مهما كانت غنية فلا نفقة واجبة عليها، وكمان علشان الرجل بيدفع مهر.. ربنا عادل وساوى المرأة بالرجل فبلاش تيجي حضرتك تتفذلك وتقول أصلوا الدين قال وعاد، على فكرة الرجل والست متساوين ماحدش أحسن من حد غير بالتقوى " إِنَّ أَكْرَمَكُمْ عِندَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ" فأكيد من الظلم إن إحنا - البني أدمين - نظلم المرأة ونقول أن الرجل أفضل منها، وكمان حاجة أخيرة.. قبل كده قريت إن الراجل اللي يعامل المرأة على إنها أميرة فده إتربى على إيد ملكة... فبلاش تخلي شكل أمك وحش .

وعلى فكرة إنت ممكن تجيب كل المعلومات والتفسيرات دي من على النت فبلاش تكسل وتقول حاجة من القرآن وإنت مش فاهم معناها أو تفسيرها .
آه بالمناسبة.. اللي يعامل المرأة على إنها مومس فده أكيد إتربى على إيد إيه ؟؟؟؟