لكم دينكم وليا دينى

حاسسها غريبة انى اقعد واكتب واتكلم فى موضوع كنا كلنا عارفينه وعايشينه واتعمل عليه افلام ومسلسلات ومسرحيات وروايات و مقالات والخ الخ الخ
اللى يخلى كل الحاجات دى توصلنا ويبقى فعلا فى فتنة طائفية ما بينا يبقى احنا شعب غبى
عارف انك حتضايق وتقولى احنا عملنا وبنينا وسوينا بس معلش احنا فعلا اغبية
ان بعد كل ده يبقى فى مابينا حاجة كدة زى الشوكة فى الزور مخليانا مش عارفين نبلع ونستحمل بعض
مش حقول احنا بقالنا قد ايه مع بعض وكلنا واحد والفرح واحد والحزن واحد والكلام ده علشان للاسف الكلام ده انا شايف بيحصل عكسه فى الواقع قدامى
عارف ان مش كل الناس تفكرها كدة بس للاسف ده الحقيقى
الفتنة مش شرط تبقى عباارة عن فيلم او مسرحية مسيئة اة حرق كنيسة او ولد خطف بنت والكلام ده الحاجات دى كل نتيجة لافكار شعب غبى مش قادر يستوعب دينه بياخد من دينه انه اسمه مسلم وبيصلى وبيصوم وطبعا حلال انه يعمل حاجات تانية وللاسف بينسى ان لكم دينكم وليا دينى
وانا مش شيخ علشان اتكلم فى حتة الدين بس حتكلم فى واقع شايفه قدامى
احنا اه فى فتنة طائفية جوه كل واحد فينا بدليل ان بنقول احنا اخوات وعايشين مع بعض و اسمنا مصريين ومافيش مسلم ومسيحى فى مصرى بس للاسف ده كلام او مكن يكون جزء منه اللى بجد
لو فعلا احنا واحد يبقى نصفى من جوانا خالص ساعتها حنقول مش مشكلة يرمموا الكنايس مش مشكلة يبنوا الكنايس
ساعتهامش حنقول اصله وفصله ونبطل الحجج التافهة بتاعت الكنايس دى كبيرة وفيها اسلحة ومحسسيسنى انكم بتتكلموا عن مصنع ذخيرة مش عن دور عبادة
والاخوة المسيحين برضه الغلط بيرجع ليهم علشان مش بيعملوا غير قلابان لما واحدة تسلم او تحب واحد مسلم وساكتين على حقوق كتيرة المفروض يطالبوا بيها انا من راى اهم
انا مش بهيج الاتنين فى بعض بس بجد تعبت من انى اشوف حاجة المفروض طبيعية تبقى غريبة ومواقف مقززة تخلى الواحد قرفان من اللى بيشوفه
الكلام ده موجه للمسلمين والمسيحين
ارجوكم اكسروا الحاجز النفسى اللى بينكم وماتقولوش مافيش حاجة علشان كدة عمرنا ما حنحل حاجة من غير ما نواجه ونعترف بالمشكلة
انا شفت ناس كتير بتحمى الكنايس وشفت المسيحين بيحموا المصلين
انا عايش فى بيت نص اهلى مسيحين النص التانى مسلمين واقسم بالله عمرى ماحسيت بفرق حتى الفترة دى عندهم صيام وبصوم معاهم ولما يبقى فى مناسبة ليهم بشاركهم علشان هما كمان بيعملوا كدة معايا وده مش بيقلل من اسلاميتى فى شىء ولا بيقلل مسيحيتهم فى شىء
خلينا ايجابين ونساعد بعض ونستحمل بعض مش نجى على نفسنا لا
احنا غصب عننا نستحمل بعض ويكون على قلبنا زى العسل
وكامسيحين اعرفوا ان ولاهى لو فى حادث حرق كنيسة او اى حادث مؤسف شبه ده دولمش مسلمين ومش مننا
للمسلمين ارجوكم ارجوكم افهموا ان الرسول كانوا عايشين فى المدينة يهود ومسيحين
ارجوكم كلنا نفهم ان الدين ده حاجة بتاعة ربنا محدش لى الحق انه يدخل فيها
ده الوقت اللى نسبت للعالم كله ان احنا اخوات بجد وبنحب بعض بجد وحنعيش وحنموت كلنا مع بعض ولو حاجة حلوة حتحصل يبقى حتحصلنا ولو حاجة وحشة حتحصل برضه حيرجع لينا